धुळे जिल्हा
: धुळे जिल्हावासीयांना सार्वजनिक आरोग्य विभागाच्या माध्यमातून दर्जेदार आरोग्य सेवा देण्यासाठी प्रयत्न करण्यात येतील, असे प्रतिपादन राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांनी येथे केले.
जिल्हा रुग्णालयात आज दुपारी मंत्री श्री. अबिटकर यांच्या हस्ते अद्ययावत अशा कार्डियाक कॅथ लॅबचा लोकार्पण सोहळा आयोजित करण्यात आला होता. त्यावेळी ते बोलत होते. यावेळी आमदार काशीराम पावरा, आमदार मंजुळाताई गावित, आमदार राम भदाणे, श्री भाऊसाहेब हिरे शासकीय वैद्यकीय महाविद्यालयाचे अधिष्ठाता डॉ. सयाजी भामरे, आरोग्य विभागाच्या सहसंचालक डॉ. सुनीता गोलाईत, आरोग्य विभागाचे उपसंचालक डॉ. कपिल आहेर, जिल्हा शल्य चिकित्सक डॉ. दत्ता देगावकर, माजी आमदार प्रा. शरद पाटील उपस्थित होते. यावेळी मान्यवरांच्या हस्ते आरोग्य विषयक पुस्तिकेचे प्रकाशन करण्यात आले. तसेच मंत्री श्री. आबिटकर यांच्या हस्ते डॉ. नीलेश चांडक, डॉ. अश्विनी भामरे, डॉ. रवींद्र सोनवणे, डॉ. सुवर्णा सूर्यवंशी आदींचा उत्कृष्ट कार्याबद्दल सन्मान करण्यात आला.
मंत्री श्री. आबिटकर म्हणाले की, आरोग्य विभागाच्या माध्यमातून अत्यंत चांगल्या पद्धतीने काम सुरू आहे. त्याची प्रभावी अंमलबजावणीसाठी विविध निर्णय घेण्यात येत आहेत. जिल्हा रुग्णालयात कार्यान्वित कॅथलॅबच्या माध्यमातून नागरिकांना दर्जेदार आरोग्य सेवा मिळेल. अन्य कॅथलॅब कार्यान्वित करण्यासाठी काम सुरू आहे. आरोग्य विभागाच्या माध्यमातून दर्जेदार आरोग्य सुविधा पुरवित जास्तीत जास्त रुग्ण शासकीय आरोग्य केंद्रात येतील यासाठी आरोग्य अधिकारी व कर्मचाऱ्यांनी प्रयत्न करावेत. आरोग्य विभागाविषयी सूचना, मागण्यांबाबत सकारात्मक दृष्टिकोन ठेवला जाईल. तसेच राज्यात २६ डे केअर सेंटर सुरू करणार असल्याचेही मंत्री श्री. आबिटकर यांनी सांगितले.
जिल्हा शल्य चिकित्सक डॉ. देगावकर यांनी प्रास्ताविक केले. वाहिद अली सय्यद यांनी सूत्रसंचालन केलेले. यावेळी जिल्हा आरोग्य अधिकारी डॉ. सचिन बोडके, अतिरिक्त जिल्हा शल्य चिकित्सक डॉ. महेश भडांगे, डॉ. स्वप्नील पाटील, डॉ. नितीन पाटील यांच्यासह आरोग्य विभागाचे अधिकारी व कर्मचारी, नागरिक उपस्थित होते.
*जिल्हाधिकारी कार्यालयात आढावा बैठक*
मंत्री श्री. आबिटकर यांच्या अध्यक्षतेखाली आरोग्य विभागाची आढावा बैठक झाली. यावेळी आमदार मंजुळाताई गावित, आरोग्य विभागाच्या सहसंचालक श्रीमती गोलाईत, अपर जिल्हाधिकारी सुभाष बोरकर, अपर पोलिस अधीक्षक डॉ. अजय देवरे, आरोग्य विभागाचे उपसंचालक डॉ. आहेर, जिल्हा परिषदेचे अतिरिक्त मुख्य कार्यकारी अधिकारी श्री. इंगळे, जिल्हा आरोग्य अधिकारी डॉ. बोडके आदी उपस्थित होते.
मंत्री श्री. आबिटकर यांनी सांगितले की, जिल्ह्यात बोगस वैद्यकीय व्यवसाय करणाऱ्यांविरोधात मोहीम राबवावी. त्यासाठी पोलिस दलाची मदत घ्यावी. पीसीपीएनडीटी कायद्याची प्रभावीपणे अंमलबजावणी करावी. त्यासाठी कृती दल गठित करावे. प्रत्येक आरोग्य केंद्रात आरोग्य कर्मचारी, वैद्यकीय अधिकारी उपस्थित राहतील याची दक्षता घ्यावी. राज्य कामगार विमा मंडळाच्या माध्यमातून विविध योजना राबविण्यात येतात. त्यांचीही कामगारांमध्ये जनजागृती करावी. त्यासाठी उद्योजकांबरोबर बैठक घ्यावी. आरोग्य केंद्रात स्वच्छता राहील, अशी काळजी घ्यावी. तसेच कर्करोग, क्षयरोगविषयी जनजागृती करावी, असेही मंत्री श्री. आबिटकर यांनी सांगितले. यावेळी डॉ. योगेश ठाकरे, सामाजिक कार्यकर्ते हिलाल माळी, सतीश महाले, मनोज मोरे, संजय वाल्हे यांनी विविध सूचना केल्या. जिल्हा आरोग्य अधिकारी डॉ. बोडके यांनी आरोग्य विभागाची माहिती दिली.