लोकप्रतिनिधींसह अधिकारी करणार नवागतांचे स्वागत
धुळे जिल्हा
राज्यातील शाळांमध्ये सोमवारपासून (16 जून) शैक्षणिक वर्षाला प्रारंभ होत आहे.त्यानिमित्त शासनाच्या शिक्षण विभागामार्फत ‘शाळा प्रवेशोत्सव 2025-26′ उपक्रम उत्साहात, प्रेरणादायी वातावरणात साजरा करण्यात येणार आहे.
धुळे जिल्ह्यात जिल्हा परिषदेच्या प्राथमिक शिक्षण विभागातर्फे जिल्हास्तरावरून 100 शाळांमध्ये तर प्रत्येक तालुक्यात 100 याप्रमाणे एकूण 500 शाळांमध्ये मान्यवरांच्या उपस्थितीत प्रवेशोत्सवाची तयारी करण्यात आली आहे. विखरण, ता. शिंदखेडा जिल्हा परिषद शाळेत पणन व राजशिष्टाचारमंत्री तथा जिल्ह्याचे पालकमंत्री जयकुमार रावल यांची उपस्थिती राहणार आहे. अशी माहिती जिल्हा परिषदेच्या प्राथमिक शिक्षणाधिकारी किरण कुवर यांनी दिली आहेत.
राज्यात विदर्भ वगळता इतर भागातील सर्व शाळांमध्ये सोमवारपासून (16 जून) तर विदर्भात 23 जूनरोजी शैक्षणिक वर्षाला प्रारंभ होत आहे. यादिवशी मंत्री, लोकप्रतिनिधी, अधिकारी हे शाळेत जाऊन प्रवेशोत्सव साजरा करणार आहेत. धुळे जिल्ह्यातील सर्व शाळांमध्ये प्रवेशोत्सावासाठी जिल्हा परिषदेच्या शिक्षण विभागामार्फत जल्लोषात तयारी केली आहे. या अनुषंगाने राज्याच्या शालेय शिक्षण व क्रीडा विभागाच्या निर्देशानुसार जिल्ह्यातील शासकीय अधिकारी, शिक्षक, मुख्याध्यापक आणि संबंधित विभागांनी सहभाग घेण्याचे आवाहन करण्यात आले असून जिल्ह्यातील अधिकाऱ्यांनी आपापल्या कार्यक्षेत्रातील किमान एका शासकीय किंवा स्थानिक स्वराज्य संस्थेच्या शाळेस भेट देण्याचे निर्देश दिले आहेत.
शाळेच्या पहिल्या दिवशी विद्यार्थ्यांचे रांगोळी, तोरण, पुष्पवर्षाव, गुलाबपुष्प देऊन मान्यवरांचे हस्ते स्वागत करण्यात येणार असून गणवेश आणि मोफत पाठ्यपुस्तकांचे वितरण शाळेच्या पहिल्या दिवशी होणार आहे. एक पेड माॅ के नाम अंतर्गत वृक्षारोपण व गोड जेवण देखील दिले जाणार आहे.
शाळाबाह्य विद्यार्थ्यांचे सर्वेक्षण पूर्ण करणे आणि सर्व पात्र मुलांना शाळेत प्रवेश दिल्याची खातरजमा करण्यात येत आहे. कोणताही विद्यार्थी शिक्षणापासून वंचित राहणार नाही, याची दक्षता घेण्यात येत आहेत. जे अधिकारी शाळेत जातील, त्यांनी वर्गखोल्या, स्वच्छता, पिण्याचे पाणी, प्रयोगशाळा, पोषण आहार, क्रीडांगण आदींचा आढावा घेण्याच्या सूचना देण्यात आल्या आहेत. विद्यार्थ्यांना स्वच्छता, वाचन, सांस्कृतिक उपक्रम, खेळ, आणि शैक्षणिक प्रगतीबाबत प्रेरित करणे, महिला बचतगट, युवक मंडळे, स्थानिक संस्था, पालक आणि शाळा व्यवस्थापन समित्यांचा सक्रिय सहभाग घेण्याच्या सूचना सर्व शाळांना दिल्या आहेत. दरम्यान, 12 ते 14 जूनदरम्यान शाळांची स्वच्छता आणि सुशोभीकरण करण्यात आले आहेत. जिल्हा परिषद, समाजकल्याण, आदिवासी विकास, नगरपरिषदेच्या आश्रमशाळांना विशेष भेटी देण्याचे नियोजन करण्यात आले आहे. धुळे जिल्ह्यात जिल्हास्तरावर जिल्हा परिषदेच्या 100 शाळांमध्ये तर तालुकास्तरावर 400 शाळांमध्ये मान्यवरांच्या उपस्थितीत प्रवेशोत्सव साजरा होणार आहे.
*मंत्री, लोकप्रतिनिधी, अधिकाऱ्यांची उपस्थिती*
विखरण, ता. शिंदखेडा येथील जिल्हा परिषद शाळेत पणन व राजशिष्टाचारमंत्री तथा जिल्ह्याचे पालकमंत्री जयकुमार रावल यांची उपस्थिती राहणार आहे. गटशिक्षणाधिकारी डी. एस. सोनवणे उपस्थित राहतील. बाळापूर, ता. धुळे जिल्हा परिषद शाळेत खासदार डॉ. शोभा बच्छाव, शिक्षणविस्तार अधिकारी अविनाश पवार, दातर्ती, ता. साक्री जिल्हा परिषद शाळेत आमदार मंजुळा गावित, शिक्षणविस्तार अधिकारी जितेंद्र झाल्टे, तेल्यामहू, ता. शिरपूर जिल्हा परिषद शाळेत आमदार काशिराम पावरा, शिक्षणविस्तार अधिकारी आर. बी भामरे, गोंदूर जिल्हा परिषद शाळेत आमदार राघवेंद्र भदाणे, गटशिक्षणाधिकारी भारती भामरे, तिखी जिल्हा परिषद शाळेत जिल्हाधिकारी भाग्यश्री विसपुते, शिक्षण विस्तार अधिकारी एस. ए. कोळी, कुळथे जिल्हा परिषद शाळेत जिल्हा परिषदेचे मुख्य कार्यकारी अधिकारी विशाल नरवाडे, केंद्रप्रमुख चंद्रकांत जाधव, हेंद्रूण जिल्हा परिषद शाळेत पोलीस अधीक्षक श्रीकांत धिवरे, शिक्षणविस्तार अधिकारी परशुराम खैरनार, सुभाष बोरकर, अप्पर जिल्हाधिकारी हे चाकरविहिर, महेश शेलार, निवासी उपजिल्हाधिकारी हे बिलाडी, चंद्रकांत पवार, अतिरीक्त मुख्य कार्यकारी अधिकारी हे शेवाळी, महेश पाटील, उपमुख्य कार्यकारी अधिकारी हे शिरडाणे, माध्यमिक शिक्षणाधिकारी मनिष पवार, सरवड तर प्राथमिक शिक्षणाधिकारी डॉ. किरण कुंवर या वरखेडे कुंडाणे येथे उपस्थित राहणार आहेत.
दिनांक १ जून पासून चालू शैक्षणिक वर्षात जिल्हा परिषद शाळांची पटसंख्या (२५%) वाढविण्याचे शिक्षणमंत्री दादाजी भुसे यांनी दिलेल्या उद्दिष्टपूर्तीसाठी जिल्ह्यात शाळापूर्व तयारी करिता जिल्हास्तरावर, तालुकास्तरावर व शाळास्तरावर बैठकांचे आयोजन करून, प्राथमिक शिक्षणाधिकारी डॉ. किरण कुंवर यांनी सर्व शिक्षक, मुख्याध्यापक, पर्यवेक्षीय अधिकारी, गटशिक्षणाधिकारी गणेश सूरवाडकर, दिनेश सोनवणे, राजेंद्र पगारे व भारती भामरे यांच्यांसह गावा-गावात जाऊन पालकांशी संवाद साधला. जिल्हा परिषद शाळेत दाखल होणा-या विद्यार्थ्यांना गुणवत्तापूर्ण शिक्षण, शासकीय योजनांचे लाभ, शासकीय योजना यांची देखील सखोल माहिती पालकांना देण्यात आली. जिल्हा परिषद शाळेत दाखल होणा-या विद्यार्थ्यांच्या पालकांना घरपट्टी, पाणीपट्टी माफ करण्याचे आवाहन काही ग्रामपंचायतीमार्फत करण्यात आले आहे. यात साक्री तालुक्यातील मालपूर, दहिवेल व रांजणीपाड़ा धुळे तालुक्यातील सांजोरी, शिरधाणे (प्र.नेर), शिंदखेडा तालुक्यातून कलमाडी, मांडळ, वाडी, शिरपूर तालुक्यातील जुने भामपूर या ग्रामपंचायतींचा समावेश आहे.
जिल्ह्यात मोफत पाठयपुस्तक मागणीच्या ९९.९५% प्राप्त झाली असून सर्व प्राथमिक शाळांपर्यंत पोहच झाली आहेत. शासन पाठ्यपुस्तके जिल्हा परिषद, महानगरपालिका, अनुदानित आश्रमशाळा, अनुदानित प्राथमिक व माध्यमिक शाळा यांना मोफत पुरविते. तसेच मोफत गणवेश योजने अंतर्गत प्रति विद्यार्थी ६०० रूपये व शूज सॉक्स साठी प्रति विद्यार्थी १७० रूपये याप्रमाणे निधी प्राप्त झाला असून, गटस्तरावर वितरित करण्यात आला आहे. शाळा व्यवस्थापन समितीच्या माध्यमातून खरेदीची प्रक्रीया करून, बील पुरवठाधारकाच्या बॅक खाती गटस्तरावरून पीएफएमएस प्रणालीव्दारे अदा केले जाते. चालूवर्षी गणवेशाचा रंग, दर्जा ठरविण्याचा अधिकार शाळा व्यवस्थापन समितीला आहे. १४ जून पर्यंत सर्व शाळांमध्ये गणवेश व शूज सॉक्स उपलब्ध झाली आहे.
जिल्ह्यात एक शिक्षकी शाळा ७३ असून, त्यांच्यासोबत पेसा कायद्यानुसार ५१ मानधनावरील शिक्षक दिले आहेत. उर्वरित शिक्षकांसोबतही मानधनावरील शिक्षकांची नेमणूक शिक्षकांच्या आंतरजिल्हा बदली प्रक्रियेनंतर करण्यात येणार आहे. जिल्ह्यात मागील वर्षाच्या पटानुसार जिल्हा परिषदेच्या १ ते १० पटाच्या २७, ११ ते २० पटाच्या ७५, २१ ते ५० पटाच्या ४२७, ५१ ते १०० पटाच्या ३१८, १०१ ते २०० पटाच्या २०३, व २०० पेक्षा अधिक पटाच्या ५४ शाळा असून यातील ८ शाळा पीएमश्री आहेत. जिल्हा परिषद शाळा, सूळे, ता. शिरपूर ही सर्वात जास्त पटाची ४१६ पट असलेली शाळा आहे.
*शिक्षणाची गंगा घराघरांत पोहोचविण्याचा संकल्प*
‘शाळा हे ज्ञानाचे मंदिर आहे; पहिल्या दिवशी स्वागत हा नव्या वाटचालीचा आरंभ असतो,’ असे म्हणत शासनाने या उपक्रमासाठी सर्वांना सहभागी होण्याचे आवाहन केले आहे. शिक्षणाची गंगा घराघरांत पोहोचवण्याचा संकल्प या प्रवेशोत्सवाच्या माध्यमातून दृढ करण्यात येणार असल्याचे शिक्षणाधिकारी डाॅ किरण कुंवर यांनी म्हटले आहेत.
000000